吸了两筒，复问道：“耐说小红自家用场大。是啥个用场，耐说说看囗。”蕙贞略怔一怔道：“倪是说说罢哉呀，小红自家末再有啥个用场，耐（要勿）到小红搭去瞎说瞎话。倘然耐说仔啥末，俚只道倪说仔俚邱话，再拨俚骂。”莲生笑道：“耐说末哉，我阿去告诉小红！”蕙贞大声道：“教我说啥物事嗄？耐搭小红三四年老相好，再有啥勿晓得？倒来问倪！”莲生笑而叹道：“耐末真真是诌头！小红说仔耐几花邱话，耐勿说俚倒罢哉，再要替俚包瞒。”蕙贞也叹道：“勿是包瞒呀，耐末也缠煞哉！小红有仔爷娘、兄弟，再要坐坐马车，阿是用场比仔倪大点。”
莲生冷笑丢开。水烟吸罢，蕙贞仍并坐相陪，和莲生美满恩情，温存浃洽，消磨了好一会，敲过十二点钟，唤娘姨收抬安睡。
蕙贞在枕上又劝莲生道：“小红个人，凶末凶煞，搭耐是总算无啥。俚故歇客人末也赛过无拨，就不过耐一个人去搭俚绷绷场面。俚勿搭耐要好，再搭啥人要好？前转明园俚要同耐拼命，倒勿是为别样，常恐耐做仔我，俚搭勿去哉。耐勿去仔，俚阿是要发极嗄？我倒劝耐，耐搭俚相好仔三四年，也该应摸着点俚脾气个哉；稍微有点勿快活，耐哝得过就哝哝罢。俚有辰光就推扳仔点，耐也（要勿）去说俚。耐说仔俚，俚勿好来怪耐，倒说是倪教耐个闲话，倪末结仔俚几花冤家。单是背后骂倪两声倒也罢哉，倘忙台面没碰着仔，俚末倒（要勿）面孔，搭倪相骂，倪阿要难为情？”莲生道：“耐说俚搭我要好，陆里会要好嗄？我坎做俚辰光，俚搭我说：‘做倌人也难得势，就不过无拨好客人；故歇有仔耐，故是再好也匆有。难再要去做一户蓦生客人，定归勿做个哉。’我说：‘耐勿做末，就嫁拨我好哉。’俚嘴里末也说是‘蛮好’，一径搭浆下去。起初说要还清仔债末嫁哉；故歇还仔债，再说是爷娘勿许去。看俚光景，总归勿肯嫁人，也匆晓得俚终究是啥意思。”蕙贞道：“故倒也无啥别样意思。俚做惯仔倌人，到人家去规矩勿来，勿肯嫁。再歇两年，年纪大仔点，难末要嫁耐哉。”莲生摇手道：“倘然沈小红要嫁拨我，我也讨勿起。前两年，三节开消，差勿多二千光景；今年加二勿对哉，还债、买物事同局帐，一节勿曾到，用拨俚二千多。耐想：我陆里有几花洋钱去用？”蕙贞复叹道：“像倪一年就一千洋钱也好哉。”莲生再要说时，只听得当中间内阿巧睡梦中咳嗽声音，遂被叉断不提。
次日上午，王莲生、张蕙贞初起身，管家来安即来禀说：“沈小红搭娘姨请老爷过去说句闲话。”蕙贞忙问“甚事”，莲生道：“陆里有啥闲话？两日勿去仔末，生来要来请哉（口宛）。”蕙贞寻思一会道：“我猜小红定归有点闲话要搭耐说。耐想囗？随便啥辰光，耐一到仔该搭来，俚哚就晓得哉。故欧是晓得耐来里该搭，来请耐，就无啥闲话也要想句把出来说说，噪得耐勿舒齐。耐说阿对？”莲生不答。
比及用毕午餐，吸足烟瘾，莲生方思过去。蕙贞连连叮嘱道：“耐到沈小红搭去，小红问耐陆里来，耐就说是来里该搭好哉。俚要搭耐说啥闲话，勿要紧个末依仔俚一半；耐就匆依俚，也（要勿）搭俚强，好好交搭俚说。小红个人不过性子粳点，耐说明白仔，俚也无啥。耐记好仔，（要勿）忘记。”
莲生答应下楼，并不坐轿，带了来安出门，只见一个小孩子往南飞跑，仿佛是阿珠的儿子，想欲声唤，已是不及。莲生却往北出东合兴里，由横弄穿至西荟芳里。阿珠早迎出门首，相随上楼，同到房里。沈小红当自闲坐，手中执着一对翡翠双莲蓬在那里玩弄；见了莲生，也不起身，只冷笑道：“倪该搭勿请耐是想勿着个哉！两日天有几花公事，忙得来一埭也匆来。”莲生佯笑坐下。阿珠接着笑道：“王老爷一请仔倒就来，还算倪有面孔，勿曾坍台。先生，耐要谢谢我个囗。”说着，先绞把手巾，忙将茶碗放在烟盘里，点起烟灯，说：“王老爷请用烟。”莲生过去，躺在榻床上手，吸起烟来。小红便道：“同到该搭来，苦煞个囗。才是笨手笨脚，无啥人来搭耐装烟。”莲生笑道：“啥人要耐装烟嗄？’当时阿珠抽空回避。
莲生本已过瘾，只略吸一口，即坐起来吸水烟。小红乃将翡翠双蓬蓬给莲生看。莲生问：“阿是卖珠宝个拿得来看？”小红道：“是呀。我买哉，十六块洋钱，比仔茶会浪阿贵点？”莲生道：“耐有几对莲蓬来浪，也好哉；再去买得来做啥？”小红道：“耐搭别人末去买仔，挨着我末就勿该应买哉？”莲生道：“勿是说勿该应买；耐莲蓬用勿着末，买别样物事好哉。’”小红道：“别样物事再买哉（口宛）。莲蓬用末用勿着。我为仔气匆过，定归要买俚一对，多豁脱耐十六块洋钱。”莲生道：“价末耐拿十六块洋钱去，随便耐买啥。该个一对莲蓬也无啥好，（要勿）买哉，阿对？”小红道：“倪是人也无啥好，陆里有好物事拨倪买？”莲生低声做势道：“阿啃！先生客气得来，啥人勿晓得上海滩浪沈小红先生，再要说勿好！”小红道：“倪末阿算得是先生（口夏）？比仔野鸡也匆如（口宛）！惶恐哉囗，叫先生！”
莲生料想说不过，不敢多言，仍嘿然躺下，一面取签子烧烟，一面偷眼去看小红。见小红垂头哆口，斜倚窗栏，手中还执那一对翡翠双莲蓬，将指甲掐着细细分数莲子颗粒。莲生大有不忍之心，只是无从解劝。
适值外场报说：“王老爷朋友来。”莲生迎见，乃是洪善卿，进房即说道：“我先到东合兴里去寻耐，说去哉。我就晓得来里该搭。”小红敬上瓜子，笑向善卿道：“洪老爷，耐寻朋友倒会寻哚。王老爷刚刚到该搭来，也拨耐寻着哉。该搭王老爷难得来个（口宛），一径来里东合兴里。今朝为仔倪请仔了、坎坎来一埭。晚歇原到东合兴去。洪老爷，耐下转要寻王老爷末，到东合兴去寻好哉。东合兴匆来浪，倒说勿定来里啥场花。耐就等来浪东合兴，王老爷完结仔事体转去来，碰头哉（口宛）。东合兴赛过是王老爷个公馆。”
小红正在唠叨，善卿呵呵一笑，剪住道：“（要勿）说哉！我来一埭听耐说一埭，我听仔也厌气煞哉。”小红道：“洪老爷说得勿差，倪是生来勿会说闲话，说出来就惹人气。像人家会说会笑，阿要巴结！一样打茶会，客人喜欢到俚哚去，同得去个朋友讲讲说说，也闹热点。到仔该搭，听仔倪讨气闲话，才匆对哉，再要得罪朋友。耐说王老爷陆里想得着到该搭来嗄！”善卿正色道：“小红，（要勿）实概！王老爷做末做仔个张蕙贞，搭耐原蛮要好，耐也就哝哝罢。耐定归要王老爷勿去做张蕙贞，在王老爷也无啥，听仔耐闲话就匆去哉。不过我来里说，张蕙贞也苦煞来浪，让王老爷去照应点俚，耐也赛过做好事。”这几句倒说得沈小红盛气都平，无言可答。于是，洪善卿、王莲生谈些别事。
已近黄昏，善卿将欲告辞，莲生阻止了，却去沈小红耳边悄悄说了几句，听不出说的什么。只见小红道：“耐去末哉（口宛），啥人拉牢耐嗄？”莲生又说两句，小红道：“来匆来，随耐个便。”莲生乃与善卿相让同行。小红略送两步，咕噜道：“张蕙贞等来浪，定归要去一埭末舒齐。”莲生笑道：“张蕙贞搭勿去。”说着，下楼出门。善卿问：“到陆里？”莲生道：“到耐相好搭去。”
两人往北，由同安里穿至公阳里周双珠家。巧囤为王莲生叫过周双玉的局，引莲生至双玉房里。洪善卿也跟进去，见周双玉睡在床上。善卿踅到床前，问双玉：“阿是匆适意？”双玉手拍床沿，笑说：“洪老爷请坐囗，对勿住。”善卿即坐在床前，与双玉讲话。
周双珠从对过房里过来，与王莲生寒暄两句，因请莲生吸鸦片烟。巧囡却装水烟与善卿吸。善卿见是银水烟筒，又见妆台上一连排着五只水烟筒，都是银的，不禁诧异道：“双玉个银水烟筒有几花嗄？”双珠笑道：“故末也是倪无（女每）拍双玉个马屁哉囗。”双玉听见，嗔道：“阿姐末总瞎说！无（女每）拍倪个马屁，阿要笑话！”善卿笑问其故，双珠道：“就是前转为仔银水烟筒，双玉教客人去买仔一只，难末无（女每）拿大阿姐、二阿姐个几只银水烟筒，才拨仔双玉。双宝末一只也无拨。”善卿道：“价末故歇再有啥勿适意？”双玉接说道：“发寒热呀。前日夜头，客人碰和，一夜勿曾因，发仔个寒热。”
说话之时，王莲生烧成一口鸦片烟要吸，不料烟枪不通，斗门咽住。双珠先见，即道：“对过去吃罢，有只老枪来浪。”当下，众人翻过对过双珠房间。善卿始与莲生说知：翡翠头面，先买几色，价值若干，已面交与张蕙贞了。莲生亦问善卿道：“有人说，沈小红自家个用场大，耐阿晓得俚啥个用场？”善卿沈吟半晌，答道：“沈小红也无啥用场；就为仔坐马车，用场大点。”莲生听说是坐马车，并不在意。
谈至上灯时候，莲生要赴沈小红之约，匆匆告别。善卿即在双珠房里便饭。往常善卿便饭，因是熟客，并不添菜，和双珠、双玉共桌而食。这晚双玉不来，善卿说道：“双玉为啥三日两头勿适意？”双珠道：“耐听俚呀。陆里有啥寒热？才为仔无（女每）忒欢喜仔了，俚装个病。”善卿问：“为啥装病？”双珠道：“前日夜头，双玉起初无拨局。刚刚我搭双宝出局去末，接连有四张票头来叫双玉。相帮、轿子才匆来浪，连忙去喊双室转来。碰着双宝台面浪要转个局，教相帮先拿轿子抬双玉去出局，再去抬双宝。等到双宝转来仔，再到双玉搭去末，晚哉。转到第四个局，台面也散哉，客人也去哉。双玉转来，告诉仔无（女每）；生来同双宝勿对，就说是双宝耽搁仔了，要无（女每）去骂俚两声。无（女每）为仔台面浪转局客人来里双宝房里，勿曾说啥。难末双玉勿舒齐哉，到仔房里，‘乒乒乓乓’损家生。再碰着客人来碰和，一夜勿曾困，到明朝就说是匆适意。”善卿道：“双宝苦恼子。碰着仔前世个冤家。”双珠道：“先起头无（女每）勿欢喜双宝，为仔俚勿会做生意，说两声；双玉进来到故歇，双宝打仔几转哉，才为仔双玉。”善卿道：“故歇双玉搭耐阿要好？”双珠道：“双玉要好末要好，见仔我倒有点怕个。无（女每）随便啥总依俚，我匆管俚生意好勿好，看匆过定归要说个，让俚去怪末哉！”善卿道：“耐说俚也匆要紧，俚阿敢怪耐！”
须臾，用过晚饭，善卿无事，即欲回店。双珠也不甚留。洪善卿乃从周双珠家出来，踅出公阳里南口，向东步行。忽听得背后有人叫声“娘舅”。
善卿回头一看，正是外甥赵朴斋，只着一件稀破的二蓝洋布短袄，下身倒还是湖色熟罗套裤，趿着一双京式镶鞋，已戳出半只脚指。善卿吃了一惊，急问道：“耐为啥长衫也匆着嗄？”赵朴斋嗫嚅多时，才说：“仁济医馆出来，客栈里耽搁仔两日。缺仔几百房饭钱，铺盖衣裳，才拨俚哚押来浪。”善卿道：“价末为啥勿转去嗄？”朴斋道：“原想要转去，无拨铜钱。娘舅阿好借块洋钱拨我去趁航船？”被善卿啐了一口，道：“耐个人再有面孔来见我！耐到上海来坍我个台，耐再要叫我‘娘舅’末，拨两记耳光耐吃！”善卿说了，转身便走。朴斋紧跟在后，苦苦求告。
约走一箭多远，善卿心想：无可如何，到底有碍体面，只得喝道：“同我到客栈里去！”朴斋诺诺连声，趋前引路，却不往悦来栈，直引至六马路一家小客栈，指道：“就来里该搭。”善卿忍气进门，向柜台上查问。那掌柜的笑道：“陆里有铺盖嗄！就不过一件长衫，脱下来押仔四百个铜钱。”善卿转问朴斋，朴斋垂头无语。善卿复狠狠的啐了一口，向身边取出小洋钱，赎还长衫；再给一夜房钱，令小客栈暂留一宿，喝叫朴斋：“明朝到我行里来！”朴斋答应，送出善卿。善卿毫不理会，叫把东洋车，自回南市咸瓜街永昌参店，短叹长吁，没法处置。
次早，朴斋果然穿着长衫来了。善卿叫个出店，领朴斋去趁航船，只给三百铜钱与朴斋路上买点心。赵朴斋跟着出店，辞别洪善卿而去。
第二十四回终。
第二十五回 翻前事抢白更多情 约后期落红谁解语
按：洪善卿等出店回话，知赵朴斋已送上航船，船钱亦经付讫。善卿还不放心，又备细写一封书信，与朴斋母亲，嘱他管束儿子，不许再到上海。令出店交信局寄去，善卿方了理自己店务。
下午无事，正欲出门，适接一张条子，却系庄荔甫请至西棋盘街聚秀堂陆秀林房吃酒的。当下向柜上伙计，叮嘱些说话，独自出门北行。因天色尚早，坐把东洋车，令拉至四马路中，先去东合兴里张蕙贞、西荟芳里沈小红两家，寻王莲生谈谈。两家都回说不在。
善卿遂转出昼锦里，至祥发吕宋票店，与胡竹山拱手，问陈小云。竹山说：“来里楼浪。”善卿即上楼来，陈小云厮见让坐。小云问：“庄荔甫么二浪吃酒，阿曾来请耐？”善卿道：“陆秀林搭呀，晚歇搭耐一淘去。”小云应诺。善卿问：“前转庄荔甫有多花物事阿曾搭俚卖脱点？”小云道：“就不过黎篆鸿拣仔几样。再有几花，才匆曾动。阿有啥主顾，耐也搭俚问声看。”善卿应诺。须臾，词穷意竭，相对无聊。两人商量着，打个茶会，再去吃酒不迟。于是，联步下楼，别了胡竹山，穿进夹墙窄弄，就近至同安里金巧珍家。
陈小云领洪善卿径到楼上房里，金巧珍起身相迎。两人坐定，巧珍问道：“西棋盘街有张票头来请耐，阿是吃酒？”小云道：“就是庄荔甫请倪两家头。”巧珍道：“庄个该节倒吃仔几台哉。”小云道：“前转庄个搭朋友代请，勿是俚吃酒。今夜头常恐是烧路头，勿是末宣卷。”巧珍道：“划一，倪廿三也宣卷呀，耐也来吃酒哉（口宛）。”小云沉吟道：“吃酒是吃末哉；倘然耐再有客人吃酒末，我就晚一日，廿四吃也无啥。”巧珍道：“无拨呀。有仔客人末，倪也勿教耐吃酒哉；为仔无拨了，来里说（口宛）。”小云故意笑道：“客人无拨末；教我吃酒；有仔客人，就挨勿着我哉。”巧珍听说，要去拧小云的嘴；碍着洪善卿，遂也笑了一笑道：“耐倒再要想扳差头哉！陆里一句闲话我说差嗄？耐是长客呀，宣卷勿摆台面，阿要坍台？生天耐绷绷倪场面，勿然为啥要做长客？倘然有仔吃酒个客人，耐吃勿吃，就随耐便。耐是长客，随便陆里一日好吃个。我说个阿差？”小云笑道：“耐（要勿）发极囗！我勿曾说耐差（口宛）。”巧珍道：“价末耐‘挨得着’、‘挨勿着’瞎说，真真火冒得来。”
洪善卿坐在一旁，只是呵呵的笑。巧珍睃见道：“难末拨洪老爷要笑杀哉！四五年个老客人，再要瞎三话四，倒好像坎坎做起。”小云道：“说说末笑笑，阿是蛮好？勿说仔，气闷煞哉。”巧珍道：“啥人教耐（要勿）说？耐说出来，就讨人气，倒说是笑话。耐看一样洪老爷做个周双珠，比仔耐再要长远点，陆里有一句打岔闲话？单有耐末，独是多花说匆出描匆出神妖鬼怪！”善卿接着笑说道：“耐两家头来里相骂，做啥拿我来寻开心？”巧珍也笑道：“洪老爷，耐勿晓得俚脾气。看俚个人末，好像